Sjónvarpslausir fimmtudagar

#22 - Sjónvarpslausir fimmtudagar - 26.3.2023

Allt er orðið annað hvort stjórnlaust eða sturlað. Bókun 35 við EES samninginn. Grænir flugskattar ESB til höfuðs millilandaflugi. Vextir og verðbólga. Ríkisfjármálin. Útlendingamál. „Uppfærsla“ samgöngusáttmála höfuðborgarsvæðisins og atvinnuauglýsingar helgarinnar.

Sigmundur Davíð og Bergþór fara yfir mál málanna. Helst í fréttum er að ríkisstjórnin virðist ætla sér að teppaleggja yfir gildandi innlendan rétt með rétthærri reglum frá Brussel. Enn hefur engin umræða orðið um þetta frumvarp utanríkisráðherra. Grænu flugskattarnir eru ræddir, enda hefur „diss-bréf“ forseta framkvæmdastjórnar Evrópusambandsins til forsætisráðherra nú verið birt. Ákvarðanir Seðlabanka, vextir og verðbólga fá sitt pláss um leið og ríkisfjármálin, eða öllu heldur stjórnleysi þeirra, er rætt og margt fleira.
Njótið.

#21 - Sjónvarpslausir fimmtudagar - 2.3.2023

Kjaramál, verkföll og verkbann, óvænt þróun mála – Verðbólga – Skattlagning EBS á millilandaflug – Lindarhvoll – Fjárhagsvandi Reykjavíkurborgar – Kostnaðarverðssprengja samgöngusáttmálans – Útlendingamál og litla-útlendingafrumvarpið.

Sigmundur Davíð og Bergþór ræða mál málanna. Óvænt þróun mála á vinnumarkaði og hvað tekur við? Verðbólga í hæstu hæðum og ríki og borg draga vagninn. Stóralvarleg staða hvað varðar áform ESB um að leggja sérstakan „loftslagsskatt“ á flug til og frá Íslandi, sem mun stórskaða flesta þætti íslensks efnahags. Leyndardómar Lindarhvols verða undarlegri dag frá degi. Lánamarkaðurinn lemur Reykjavíkurborg, sem státar af ósjálfbærum rekstri og stjórnlausri skuldasöfnin. Loksins er farið að kalla eftir endurskoðun samgöngusáttmála höfuðborgarsvæðisins, þörfin á því blasir við öllum nema innviðaráðherra. Litla-útlendingamálið minnkar enn. Lítið var en búið er. Þetta og margt fleira í SLF þætti þessarar viku.
Njótið!

#20 - Sjónvarpslausir fimmtudagar - 23.2.2023

Kjaramál og kjördæmavika – blikur á lofti í alþjóðaflugi – Lindarhvoll og samgöngusáttmáli höfuðborgarsvæðisins – Sparnaðaráform gjaldþrota Reykjavíkurborgar með lokun Borgarskjalasafns og margt fleira ber á góma.

Sigmundur Davíð og Bergþór ræða mál málanna. Kjaramál og deila SA og Eflingar og þá ótrúlegu stöðu sem þar er að teiknast upp. Grafalvarleg staða er jafnframt að birtast með nýju regluverki Evrópusambandsins, sem verður íslenskum flugrekendum mjög mótdrægt. Áhugi ráðherra og bæjarstjóra í nágrannasveitarfélögum höfuðborgarinnar á að endurskoða samgöngusáttmála höfuðborgarsvæðisins er ræddur um leið og meirihlutinn í Reykjavík hafnar slíkum hugmyndum. Kjördæmavikan, þar sem samgöngumál, loftslagsmál, ponzi-votlendissjóðurinn, málefni landbúnaðar og útlendingamál komu ítrekað upp.
Allt þetta og meira til.

#19 - Sjónvarpslausir fimmtudagar - Brynjar Níelsson kemur í heimsókn - 9.2.2023

Útlendingamálið – Rétttrúnaðurinn – Hatursorðræðan – Slaufunarmenningin – Sprenging í ríkisútgjöldum – Vinnumarkaðurinn og fleira.

Sigmundur Davíð og Bergþór fá Brynjar Níelsson í heimsókn og ræða meðal annars útlendingamálið sem nú er komið til þriðju umræðu og útlendingamálin almennt. Áhrif rétttrúnaðarins á samfélagið, yfirvofandi hatursorðræðunámskeið forsætisráðherra og slaufunarmenninguna og áhrif háskólaelítunnar.
Útþensla ríkisútgjalda og Borgarlínubrjálæðið. Hvað er til ráða? Eru útgjöldin orðin endanlega stjórnlaus?
Mikilvægi borgaralegra sjónarmiða og hvað þarf til til að snúa vörn í sókn.
Njótið, eða ærist.

#18 - Sjónvarpslausir fimmtudagar útlendingamál - 7.2.2023

Sérútgáfa – Útlendingamál 

Sigmundur Davíð og Bergþór ræða útlendingamál í víðu samhengi í þessum fyrsta sérþætti Sjónvarpslausa fimmtudaga sem fjallar um málaflokkinn, þær hættur sem blasa við og það hvernig best verður á málum haldið.Gríðarleg fjölgun umsókna um alþjóðlega vernd setur þrýsting á öll stöðkerfi velferðarþjónustu. Það á við um menntakerfið, heilbrigðiskerfið, félagslegu kerfin og húsnæðismálin.
Markmiðið hlýtur á endanum að vera að gera vel við þá sem eru í mestri neyð og hjálpa þeim að aðlagast íslensku samfélagi. Núverandi stefna stjórnvalda styður ekki við þá nálgun.
Það þarf að tryggja að umræðan um málaflokkinn sé byggð á staðreyndum en ekki tilfinningum. Stjórnvöld þurf að hafa kjark til að takast á við það risaverkefni sem útlendingamálin eru, um leið og það þarf að vera hægt að ræða þau opinskátt og lausnamiðað.

#17 - Sjónvarpslausir fimmtudagar - 3.2.2023

Samgöngusáttmáli verður dýrari – 650% kostnaðarhækkun – Lindarhvoll og leyndarhyggjan – Litla útlendingamálið – Votlendissjóður – Ráðningastopp Reykjavíkurborgar

Sigmundur Davíð og Bergþór fara yfir helstu mál vikunnar.
Samgöngusáttmáli höfuðborgarsvæðisins hefur nú hækkað í verðmati um 50-60 milljarða og einn verkþáttur um 650% eða 15 milljarða (eina „Þjóðarhöll“).
Stjórnvöld halda áfram leyndarhjúpi yfir greinargerð setts ríkisendurskoðanda vegna Lindarhvols, en nú eru staðreyndir málsins farnar að komast í umræðu eftir aðalmeðferð í héraðsdómi í liðinni viku. Jafnt og þétt þrengir að forseta Alþingis hvað birtingu varðar.
Útlendingamálin hafa undirlagt þingstörfin þessa vikuna og gera það að líkindum eitthvað áfram. Útlendingamál dómsmálaráðherra hefur verið þynnt svo út síðan Sigríður Andersen lagði það fyrst fram að varla er hægt að kalla það annað en „litla útlendingafrumvarpið“. Nokkur orð um það.
Ponzi-Votlendissjóðurinn er ræddur og það hvernig lofslagsmálin eiga það til að leiða fólk (og fyrirtæki) út í mýri.
Krafa umhverfisráðherra um aukna birgðastöðu olíufélaga er kómísk í því ljósi að sami ráðherra vill banna rannsóknir á mögulegum olíuauðlindum innan íslenskrar lögsögu og ríkisstjórnin hefur þegar leitt í lög bann við nýskráningu bifreiða sem ganga fyrir bensíni og díselolíu.
Tilraunir Reykjavíkurborgar til að hætta ónauðsynlegum ráðningum virðast hafa runnið út í sandinn, kjaradeilur, þjóðarhöllin sem enginn veit hver á að borg eða reka, staðsetning nýja Landspítalans og margt fleira ber á góma.

Njótið!

#16 - Sjónvarpslausir fimmtudagar - 26.1.2023

Fyrsti þáttur SLF á nýju ári – Útlendingamál – Sala aflátsbréfa – Slaufun og hatursorðræða

Fyrsta vika þingstarfa, að aflokinni tíðindalítilli nefndaviku, var undirlögð umræðu um útlendingafrumvarp dómsmálaráðherra.
Eins og SDG lýsti því í framsöguræðu sinni, þá er frumvarpið nú orðið að „litla útlendingafrumvarpinu“ og „það er ekki lagt fram í fyrsta sinn, ekki í annað sinn, ekki þriðja sinn og ekki í fjórða sinn heldur í fimmta sinn; þetta ræksni, þetta útþynnta og örvinglaða frumvarp, þessi svokallaða málamiðlun milli skynsemishyggju og fullkominnar vitleysu, þetta sýnishorn yfirgefinna áforma umvafið afsökunum og kerfisflækjum, þessi uppgjöf.“
Sala aflátsbréfa orkufyrirtækjanna var rædd og sett í samhengi við belgíska tannlækninn sem vill „kolefnisjafna aksturinn á jeppanum sínum“. Fá regluverk kerfisins ganga jafn rækilega gegn yfirlýstum markmiðum sínum og aflátsbréfakerfið. Sigmundur Davíð og Bergþór ræða það og fleira sem tengist lofslagsmálum, svo sem lofslagsráðstefnuna í Egyptalandi, COP27 og það hvernig ályktanir slíkra funda verða til. Það er ekki girnileg pylsuframleiðsla.
Slaufunarmenningin og hatursorðræðunámskeið forsætisráðherra fá sitt pláss og margt fleira ber á góma.

#15 - Sjónvarpslausir fimmtudagar - 3.1.2023

SLF verðlaun ársins í 75 flokkum.

Sigmundur Davíð og Bergþór fara yfir árið 2022 og veita hin árlegu SLF verðlaun, sem mörg hver byggja á kaldhæðni í garð þess sem þau hlýtur.

Af handahófi:

• Sölumaður ársins: Jón Gunnar Jónsson, forstjóri bankasýslunnar.
• Handbók ársins: Handbók Reykjavíkur um vetrarþjónustu.
• Vonbrigði ársins: Útgjaldavöxtur ríkissjóðs undir forystu Sjálfstæðisflokksins.
• Vísindamaður ársins: Loftslagsráðherra fyrir áform um að banna rannsóknir í íslenskri efnahagslögsögu.
• Vinnuveitandi ársins: Reykjavíkurborg fyrir að hugleiða að hætta að ráða ónauðsynlega starfsmenn, fækka leikskólakennurum og fjölga upplýsingafulltrúum.
• Snjómokstursmaður ársins: Einar Þorsteinsson.

Og ótal fleiri verðlaun sem menn munu til langs tíma hafa innrömmuð uppi á vegg á skrifstofum sínum.

Takk fyrir samfylgdina á liðnu ári og gleðilegt nýtt ár!

#14 - Sjónvarpslausir fimmtudagar - 18.12.2022

Haustþingið – Hvað gerðist? Hvað gerðist ekki? Hvaða ráðherra missti boltann oftast í gólfið? Hver er valinn ráðherra haustþingsins?

Sigmundur Davíð og Bergþór taka saman og fara yfir helstu atburði haustþingsins – samantekt sem þessi er ófáanleg annars staðar en í Sjónvarpslausum fimmtudögum.
Fór ríkisstjórnin í sérstakar æfingarbúðir til að undirbúa Íslandsmet sitt í útgjaldaaukningu? Eða er flokkunum fjárausturinn bara eðlislægur?
Stjórnleysi ber á góma, oft: Stjórnleysi í fjárútlátum. Stjórnleysi á landamærunum. Stjórnlaus fjölgun starfsmanna í hluta stjórnarráðsins. Stjórnlausir biðlistar og linnulausar árásir á bændastéttina.
Allt þetta og meira í sérstakri hátíðarútgáfu af Sjónvarpslausum fimmtudögum, beint í viðtæki landsmanna.
Þingflokkur Miðflokksins óskar hlustendum öllum gleðilegra jóla og þakkar samfylgdina á haustþinginu. Við erum rétt að byrja.

#13 - Sjónvarpslausir fimmtudagar - 16.12.2022

Stjórnlaus ríkisútgjöld staðfest í fjárlögum – Hærri gjöld og skattar – Starfsstétt lögð niður – Borgarlínan og samgöngur á höfuðborgarsvæðinu – jóladagatal RUV og stysta HM hornið til þessa.

Ríkisstjórnin setti fimm Íslandsmet hið minnsta með stjórnlausri útgjaldaaukningu ríkissjóðs, framtíðin fær að borga. Gjöld hækka, meðal annars hækkar tiltekinn kostnaður bænda um 173% sem kallar fram 100 milljón króna reikning sem lendir á þröngum rekstri bænda landið um kring.
Nýsamþykkt lög um leigubifreiðaakstur fá sitt pláss, en þar var leigubifreiðastjórum landsins rétt stutta stráið í boði formanns Framsóknarflokksins.
Borgarlínan og takmarkaðar framkvæmdir á stofnbrautum höfuðborgarsvæðisins fá sitt pláss, í samhengi við nýtilkominn áhuga fjármálaráðherra á að fjárfesta verulega í almenningssamgöngum. Verst ef það verður til ógagns.
Jóladagatal RUV og viðbrögð við þáttunum eru rædd undir lok þáttar.
Að endingu bíður HM-Sigmundur upp á stysta HM hornið til þessa.