Sjónvarpslausir fimmtudagar

#2 - Sjónvarpslausir fimmtudagar - 22.9.2022

Óseðjandi ríkissjóður.
Sigmundur Davíð og Bergþór fara yfir tekjuhlið fjárlaga, svikin loforð, útlendingamál og skipulagða glæpastarfsemi. ESB tillaga Samfylkingarinnar er krufin og sala aflátsbréfa sömuleiðis. Í lok þáttar er “villa vikunnar” leiðrétt.

#1 - Sjónvarpslausir fimmtudagar - 16.9.2022.

Fjárlög á mannamáli.
Sigmundur Davíð og Bergþór fara yfir aðalatriði fjárlagaumræðunnar; ófremdarástand á landamærunum, veggjöld, húsnæðismál, bann við orkurannsóknum og dýrustu fermetrar landsins í Landsbankahúsinu er meðal þess sem rætt er um.

Erna Bjarnadóttir og Sigurður Már ræða fullveldismál.

Gestur Miðvarpsins í dag er Erna Bjarnadóttir hagfræðingur og fyrrverandi aðstoðarframkvæmdastjóri Bændasamtaka Íslands en hún skipar annað sæti á lista Miðflokksins í Suðurkjördæmi. Framboð Ernu hefur vakið athygli og eftirtekt í Suðurkjördæmi enda er hún ekki vön að liggja á skoðunum sínum. Erna var lengi í stjórn Heimssýnar og formaður um tíma og hefur talað skelegglega fyrir fullveldi landsins. Hún segir að sér sé annt um að Íslendingar haldi góðum samskiptum við Evrópusambandið en fráleitt sé að ganga þangað inn. Hún segist undrast viljaleysi ESB-flokkanna við að setja málið á dagskrá þó hún segist auðvitað fagna því. Fullveldismálin séu hins vegar alltaf til umræðu og ljóst sé að þar sé Miðflokkurinn í fylkingarbrjósti. Hér fer Erna yfir stöðuna í þessum málaflokki í spjalli Miðvarpsins við hana.

 

Danith Chan sem situr í 2. sæti á framboðslista Miðflokksins í Reykjavíkurkjördæmi suður

Gestur Miðvarpsins í dag er Danith Chan sem situr í 2. sæti á framboðslista Miðflokksins í Reykjavíkurkjördæmi suður.  Danith ólst upp í Kína og Egyptalandi og flutti til Íslands árið 2000 eftir að hafa nám í Beijing í í Kína og kynnst þar íslenskum eiginmanni sínum. Hún hefur verið búsett hér á landi síðan og eiga þau tvö börn. Danith er með MBA gráðu frá Háskólanum í Reykjavík og meistaragráðu LLM frá Lagadeild Háskóla Íslands.  Danith hefur fjölbreytta menntun og áhugaverðan bakgrunn en í dag starfar hún að ferðaþjónustu og hefur gert undanfarin ár og náð að byggja upp áhugaverðan ferðaskrifstofurekstur sem einkum þjónustar ferðamenn frá Asíu. Danith þekkir vel þær áskoranir sem steðja að rekstri lítilla og meðalstórra fyrirtækja hér á landi og telur að verulegra úrbóta sé þörf á regluumhverfi þeirra. Þá hefur hún sterkar skoðanir á rekstri heilbrigðis- og skólakerfisins hér á landi. Nauðsynlegt sé að framkvæma kerfisuppstokkun á mörgum þáttum starfsseminnar og hún telur rétt að stytta grunnskólastigið um eitt ár. Allt þetta og meira má finna í spjalli Miðvarpsins við Danith Chan.

 

Aðför að heilsu kvenna Erna Bjarnadóttir

 

Gestur Miðvarpsins í dag er Erna Bjarnadóttir hagfræðingur en hún skipar annað sæti á lista Miðflokksins í Suðurkjördæmi. Óhætt er að segja að Erna hafi komið með látum inn í kosningabaráttuna og vakið athygli fyrir skelegga og málefnalega umræðu. Erna hefur sérstaklega látið málefni heilbrigðiskerfisins til sín taka enda má segja að þar ríki ófremdarástand. Erna hefur verið í forystu hópsins „Aðför að heilsu kvenna“ sem var stofnaður fyrir rúmu hálfu ári síðan í kjölfar þeirra einstöku stöðu sem komin var upp í leghálsskimun kvenna sem er líklega eitthvert mesta hneyksli heilbrigðiskerfisins undanfarina áratugi. Á aðeins 16 dögum tókst að safna 5.440 undirskriftum á þremur tungumálum til að mótmæla stöðunni. Framan af þögðu fjölmiðlar um málið og enn í dag sleppur heilbrigðisráðherra við óþægilegar spurningar vegna þess. En ekki af hendi Ernu sem hér fer yfir þetta mál og annað það sem á bjátar í heilbrigðiskerfinu. Allt þetta má finna í spjalli Miðvarpsins við Ernu.

Fjóla Hrund Björnsdóttir, oddviti Miðflokksins í Reykjavíkurkjördæmi suður

Gestur Miðvarpsins í dag er Fjóla Hrund Björnsdóttir sem skipar efsta sæti Miðflokksins í Reykjavíkurkjördæmi suður. Fjóla Hrund hefur verið virk í stjórnmálum frá unga aldri og er með próf í stjórnmálafræði frá Háskóla Íslands. Hún hefur tekið sæti sem varaþingmaður á Alþingi og hefur starfað sem framkvæmdastjóri þingflokks Miðflokksins síðustu ár.

Fjóla Hrund leggur áherslu á velferðarmál og þá sérstaklega málefni aldraðra og ungs fólks. Alvarlegastar séu þó þær ógöngur sem heilbrigðiskerfið er komið í undir stjórn núverandi ríkisstjórnar. Hún telur að það sérstaklega brýnt að horfa til þarfa aldraðra sem eru ólíkar og margvíslegar. Það þurfi að styrkja stofnanaumhverfi á umönnunarsviði aldraðra en eldri borgarar hafa beðið allt of lengi eftir leiðréttingu sinna kjara. Eldri borgarar eigi að njóta jafnræðis á við aðra, greiða sams konar skatta og hafa frelsi til að stjórna eigin lífi.

Fjóla Hrund segir að skerðingar Almannatrygginga séu ekki aðeins ósanngjarnar og til þess fallnar að gera fólki erfitt fyrir við að bæta líf sitt. Þá berst Fjóla Hrund fyrir bættri stöðu ungs fólks, sérstaklega þegar kemur að húsnæðismálum.  Þannig verði öllum íslenskum ríkisborgurum gefinn kostur á að kaupa eign (miðað við ákveðin stærðarmörk) með hlutdeildarframlagi frá fjárfestingarsjóði fasteigna.

Það segir Fjóla Hrund gagnast ungu fólki best. Í hennar kjördæmi, Reykjavík, verði að taka samgöngumálin föstum tökum, tryggja þarf lagningu Sundabrautar og efla almenningssamgöngur. Allt þetta og meira má finna í spjalli Miðvarpsins við Fjólu Hrund.

Gestur Miðvarpsins að þessu sinni er varaþingmaður Miðflokksins, Þorgrímur Sigmundsson

Gestur Miðvarpsins í dag er Þorgrímur Sigmundsson frá Húsavík. Þorgrímur er varaþingmaður Miðflokksins og býður sig fram í þriðja sæti á lista Miðflokksins í Norðausturkjördæmi.

Þorgrím ætti ekki að þurfa að kynna fyrir fólki í Miðflokknum en hann hefur unnið ötullega innan flokksins frá stofnun hans og verið skeleggur talsmaður síns kjördæmis. Um leið hefur hann haldið á lofti sjónarmiðum landsbyggðar og landbúnaðar.

Hann segist hafa áhyggjur af misvægi milli landsbyggðarinnar og suðvesturhornsins og telur brýnt að styðja við uppbyggingu úti á landi og efla þannig byggð um allt land. Þorgrímur telur mikil og ónýtt tækifæri í landbúnaði og frekari uppbyggingu ferðaþjónustu. Undanfarin ár hafi það sýnt sig hve mikilvægt sé að styðja við þessa þróun en um leið verði að efla og styrkja samgöngur landsins. Atvinnumálin brenna á Þorgrími og þeir sem vilja kynna sér hvaða lausnir eru þar áhugaverðastar ættu að leggja við hlustir þegar Þorgrímur talar.

Allt þetta má finna í spjalli Miðvarpsins.

 

Sigurður Már tekur á móti Ágústu sem skipar fjórða sæti á lista Miðflokksins í Norðausturkjördæmi

Gestur Miðvarpsins í dag er Ágústa Ágústsdóttir sem skipar fjórða sæti á lista Miðflokksins í Norðausturkjördæmi. Ágústa býr í Kelduhverfi og stundar ferðaþjónustu samhliða búrekstri. Hún er fædd og uppalinn í höfuðborginni en hefur valið að búa fjarri borginni og hefur gerst ein skeleggasti talsmaður landsbyggðarinnar í seinni tíð. Ágústa hefur meðal annars vakið athygli fyrir málflutning sinn gegn hálendisfrumvarpi umhverfisráðherra sem hún telur freklegt inngrip í lýðræðisvald sveitarfélaganna auk þess sem markmiðssetning frumvarpsins sé í skötulíki. Óhætt er að segja að Ágústa gjör þekki málið og hér fer hún rækilega yfir það. Óhætt er að hvetja þá sem vilja setja sig vel inn í þetta sérstaka mál að leggja við hlustir þegar Ágústa talar.

 

Högni Elfar Gylfason

Gestur Miðvarpsins í dag er Högni Elfar Gylfason frá Korná í Skagafirði. Högni er í fimmta sæti á lista Miðflokksins í Norðvesturkjördæmi og er sauðfjárbóndi, vélfræðingur og vélvirkjameistari. 

Högni gjörþekkir málefni landbúnaðarins og lætur sig einnig samgöngumál miklu varða en þau hafa lengi verið í miklum ólestri í Norðvesturkjördæmi. Þar hefur viðhaldi malarvega ekki verið sinnt síðan fyrir bankahrun fyrir bráðum þrettán árum.

Högni er mjög gagnrýnin á stöðuna í sauðfjárrækt sem gerir bændum nánast ókleift að lifa af greininni. Þá telur hann að það ríki fákeppni í verslun með matvörur hér landi og innflutningur kjöts hafi skapað ósanngjarna samkeppni við innlenda framleiðendur og valdi óeðlilegum viðskiptaháttum. Það er ástæða til að leggja við hlustir þegar Högni ræðir stöðuna í landbúnaði.

 

 

Vilborg er nýr oddvíti Miðflokksins

Gestur Miðvarpsins í dag er Vilborg Þóranna Bergmann Kristjánsdóttir, nýr oddviti Miðflokksins í Reykjavíkurkjördæmi norður. Vilborg Þóranna hefur mikla reynslu sem lögfræðingur, sáttamiðlari og eftir öflugt starf við margvísleg félags- og góðgerðarmál. Vilborg segist ekki óttast áskoranir en hún hefur verið félagi í Miðflokknum frá stofnun eins og margir í hennar fjölskyldu.  Hún segist ávallt hafa verið pólitísk og látið sig samfélagsmál varða og þorir að ræða erfið mál. Velferðarmál og málefni barna og unglinga eru henni sérstaklega hugleikin. „Við höfum skyldur gagnvart eldri borgurum,“ segir Vilborg í spjalli við Miðvarpið. Leggið við hlustir, hér er komin nýr og áhugaverður leiðtogi í Miðflokknum.